21.5.07

Rosa Aneiros


De interese especial para bachareis.

Lede a entrevista de Lupe Gómez con Rosa Aneiros publicada no Galicia Hoxe.

Para quen no teña lido Veu visitarme o mar, ten aquí unha primeira achega.

Tamén podedes ver as súas colaboracións na páxina do Consello da Cultura.

A autora dispón dunha ficha moi resumidiña na Wikipedia.

Outra entrevista atoparédela nesta páxina de Caixagalicia.
(Imaxe de Galicia Hoxe, 21 de maio de 2007).

19.5.07

Guía sexual da sociolingüística

En realidade, o artigo de Sechu Sende ó que facemos referencia ten pouco que ver co adxectivo que figura no título, pero moito cunha relación afectiva coa lingua. Ironías á parte, trátase dun texto moi asisado e merecente de ser levado á práctica.
O artigo suscita unha agradable sensación nos que temos coa lingua unha relación amorosa tan real coma inexplicable. Mais non nos impide mirar de esguello para quen tamén nisto se comporta coma un baballoso ou un baldreu, dispensando.
Lédeo e que vos sirva de proveito.

(Os bachareis podedes engadilo ós vosos "apuntiños" sobre lingua e sociedade. En serio.)
Abur, e sede felices (se podedes).
Sobre o asunto, vede tamén http://www.blogoteca.com/literactua/index.php?cod=15124.

(Imaxe: Sechu Sende fotografado por Nacho Santás. Galicia Hoxe.)

18.5.07

María Mariño. O día despois

Pasada a festa e metida a gravata no caixón do armario, algúns mesmo con desgusto, cómprenos botar unha ollada atrás. O artigo que enlazamos resulta unha boa axuda. Pedro Rielo reflexiona sobre como lle sentaría á autora homenaxeada a súa elevación ós altares das Letras, cando en vida non gustaba moito desas romarías. Tamén apunta algunha idea de como debería ser a celebración das Día das Letras e que non estaría de máis considerar.

(Imaxe de http://www.17demaio.org/marino2007/galizamarino.php?lg=gal.)

17.5.07

María Mariño. O día.


Unha ollada a prensa de hoxe e vemos as primeiras páxinas en galego. Xa case nin é estraño. Outro cantar xa é o desenvolvemento das noticias desas primeiras páxinas.
Para os que nos interesamos pola figura literaria destacamos:
O Faro da Cultura, e a Revista das Letras.
O dixital Xeración Web publica un artigo ("O legado de María Mariño"), con vídeo incluído.
Outros suplementos dos xornais, adiantados ó gran día, xa quedaron citados nesta sección.
Para os escolantes ten interese o seguimento que o blog Maestro está a facer do tratamento que lle dan a prensa e internet a María Mariño. Tamén propón actividades para achegarse ó coñecemento da poeta.

(Imaxe de Galicia Hoxe, 17-5-07. Ilustra unha noticia relacionada coa cruz da moeda da lingua)

Santa Facundia y santa Desvergüenza, orate pro nobis

Gústame o artigo de Plácido Lizancos que publica no Galicia Hoxe. Gústame polo ben que expón unha triste realidade, non porque me alegre esa realidade da que fala.
Non poño en dúbida a calidade dos nosos políticos. Pero se se lles medise a calidade pola requintada lingua que empregan, daría máis que chuchar a cabeza dunha gamba.
O que non chego a entender é que, levando tanto tempo como levan algúns metidos na política profesional e empregando o galego, mesmo como rito, aínda o teñan tan escalazadiño.
E se non dan controlado un idioma tan sinxelo, ¿que faran co destino do país?
A resposta témola en Irlanda. Vede, se non, o artigo "Igualiño que nós", publicado en La Voz de Galicia (17-5-07, edición impresa): "No lo han hecho con el afamado modelo gallego. ¿Por qué pita Irlanda? Pues porque a las multinacionales les resulta práctico un país donde todo el mundo habla inglés (...)".
E un pensando que a incompetencia, a fachenda, o atraso... en fin, todas esas virtudes que asolagan os países e as súas xentes, non tiñan relación co idioma que falasen. Andaba trascaburrado. Perdón.
(O artigo que se cita tampouco está escrito en inglés. Aínda así, hai afirmacións que pitan que dá gusto.)

(Imaxe de http://www.maisondelapoesie.be/article.php?id=261.)

16.5.07

María Mariño. Vésperas

Vésperas do Día das Letras. Seguen aparecendo achegas sobre a figura e a obra homenaxeadas. No Galicia Hoxe atopamos un artigo de Xosé Ramón López Boullón: "María Mariño (do mar)".

No mesmo xornal, Xosé Lois García escribía sobre "A poética de María Mariño".

O xornal gratuíto De luns a venres publica un suplemento especial (versión pdf) dedicado á poeta.
(Imaxe da exposición Cantiga da costureira poeta: http://www.17demaio.org/marino2007/multimedia.php)

13.5.07

María Mariño. Entrevista co seu biógrafo






Xeración web publica unha entrevista con Xerardo Agrafoxo, biógrafo de María Mariño. É de interese para todos, especialmente para os bachareis.



Tocante á biografía da autora publicada por Agrafoxo xa quedou indicado por algures nesta mesma sección que, ademais de presentar moitos datos novos, resulta de lectura amena.


12.5.07

María Mariño. O mito


Co título de "María Mariño, realidade e mito" aclara Mendez Ferrín no suplemento "El Sábado", do Faro de Vigo, algúns dos misterios que rodeaban a figura da poeta.

Despois dun detallado percorrido polos camiños que puideron levar á crenza da existencia ou non de María Mariño, conclúe Méndez Ferrín:


María Mariño existiu e carne e óso e escribiu poemas que gozan de intensidade e orixinalidade inusuais. Non importa que se fagan novelas e se tramen fantasías sobre a biografía da poetisa. Hoxe, aos cen anos do nacemento de María Mariño, o que se espera é que sexa lida e que os seus textos lle digan aos máis novos aquilo que para nós pasou desapercibido.
Cousa que acontece só cos grandes.

Adolfo Caamaño


Non perdades de ler o artigo "Adolfo Caamaño, o escritor pegado á realidade da terra", que Xaime Leiro publica no Galicia Hoxe.

A lección básica é a aposta "na súa concepción vital pola simbiose do home e do medio". Aquí no país, os que somos aldeaniños viviamos este principio case que sen que ninguén nolo explicase. Agora que somos todos aldeaniños globais teñen que ir debullándonos os medios conceptos que antes se entendían de seu.

O artigo é amplo e interésanos, polo menos, no aspecto literario.
(Foto de X. M. Albán. Galicia Hoxe, 12-5-07.)

11.5.07

Cunqueiro


Lemos un longo artigo de Xabier Cordal no Galicia Hoxe que recupera a figura dun Cunqueiro de hai 30 anos. Refírse o articulista a un programa de TVE sobre clásicos vivos, e aconséllanos recuperar o Cunqueiro daqueles tempos a través de internet. O ciberenderezo do blog ó que se refire é http://www.blues-propicios.blogspot.com/ Titúlase o artigo do Blues "Entrevista con Álvaro Cunqueiro". Tamén podedes atopar o programa nestoutro enderezo: http://www.vieiros.com/nova/58031/reflexions-de-cunqueiro-sobre-o-ser-de-galiza.

Resulta agradable escoitar a Cunqueiro. Gastade un pouco de tempo na empresa. Total, trinta anos non é case que nada.

10.5.07

María Mariño, alegre e culta


Van caendo coma pingueiras as novas sobre a figura de María Mariño. Desta vez son as declaracións da súa sobriña neta: "Maite Martín, nega que a poeta fose "triste" e "ignorante" e defínea como unha persoa alegre e culta". Lemos o artigo no Galicia Hoxe.

La Voz de Galicia publica hoxe (10-05-07) un amplo suplemento sobre a poeta.

Non deixedes de visitar tampouco esta páxina da Consellería de Cultura, de onde está collida a imaxe que figura enriba.

8.5.07

María Mariño. Novas achegas

Os que andades agora por segundo de bacharelato podedes achegarvos ó artigo que publica A Nosa Terra sobre a figura homenaxeada nas Letras deste ano. Faise eco das últimas contribucións ó coñecemento da figura de María Mariño.
Aí volo deixo, por se vos peta botarlle unha ollada.

3.5.07

Literatura e terapia


Dous artigos publicados no Galicia Hoxe fan referencia á literatura como recurso terapéutico. Un deles, da autoría de Anxo Tarrío, fálanos dun experimento hospitalario baseado na literatura. Isto é, do emprego da lectura ou da escrita como medicamento para o alivio ou curación de enfermidades. O outro artigo recolle a noticia da presentación dun novo libro sobre a obra de María Mariño: María Mariño, no ronsel das escritoras galegas (Laiovento), de Pilar García Negro. A autora tamén incide no aspecto terapéutico da escrita da poeta: "A poesía úsase como terapia no seu refuxio natal". E subliña o feito de que María Mariño escriba nunha época escura, sabéndose enferma de morte.

1.5.07

Mentres a herba medra


Mentres a herba medra é o título da novela coa que Xesús Rábade Paredes gañou o Blanco Amor deste ano. Sobre o evento destacamos dúas noticias. A publicada no Galicia Hoxe céntrase na novela, mais tamén anuncia proxectos futuros. En La Voz de Galicia aparece unha entrevista co escritor, na que fai un pequeno repaso á súa obra anterior e bota unha ollada esperanzada ás novas xeracións.

(Imaxe de Galicia Hoxe, 1-5-07)