15.2.13

Roberto Vidal Bolaño. Achegas na rede

Roberto Vidal Bolaño. Foto: Galicia Hoxe
Designación para as Letras 2013

Achegas ó autor

Imaxe: robertovidalbolano.org


Efemérides


Roberto Vidal Bolaño. Achegas na rede-2.

13.2.13

Dime algo sucio. Léxico-2

Para o grupo de lectura de Dime algo sucio (de Diego Ameixeiras).
O exercicio consiste en atinarlle co significado ás palabras que se sinalan no test.
Pode facerse en liña na ligazón indicada.

11.2.13

Roberto Vidal Bolaño. Mar revolto

Imaxe
 centroculturalporrino.com
Baixo o título simbólico de Mar revolto Vidal Bolaño cóntanos a historia do secuestro do Santa María segundo a experiencia dun grupo de pasaxeiros de terceira clase. Ao espectador chégalle a historia en diferido e cando xa é un conflito resolto. No tempo do espectador os personaxes falan “con alguén a quen non vemos” ou “co mesmo ou con outro descoñecido a quen seguimos sen ver”, pero tampouco se pode dicir que os protagonistas dos feitos os vivisen dunha forma directa, salvo María e Mans de Prata que, por razóns de traballo, chegan a andar cerca dos revolucionarios. O resto dos ocupantes do camarote saben dos acontecementos a través dos altofalantes, da información de María, dos dixomedíxomes e da radio das ditaduras ibéricas, na que non acreditan moito.
Á parte do feito histórico, os personaxes amósannos a esperanza de que o idealismo revolucionario traia un aire novo para as súas vidas. Ata que o Santa María non se convertera en Santa Liberdade as cubertas do barco eran estancas segundo a clase social, salvo para María, que servía na alta e vivía na baixa. O control do trasatlántico polos revolucionarios democratizou as cubertas, polo menos así o ve o carteirista. A Regina permítelle realizar o soño dun baile nun salón de luxo e liberarse, aínda que sexa só un momento, das gadoupas do marido miserable.
Así e todo, cando comeza a representación xa sabemos que todo fora un fermoso soño e que as augas da historia e da ficción volveran ao vello rego.
A peza está inzada de elementos simbólicos entre os que destacan os nomes do barco e a carteira roubada dun revolucionario con documentos persoais, un poema a medio facer e nin un só billete, isto é, moita preparación e idealismo a rebordar, xente que non pensa en si mesma.


Imaxe
ruc.udc.es/dspace/handle/2183/7270

Mar revolto é unha obra de encarga (p. 15) que puña en marcha “un proxecto de coprodución teatral galego-portuguesa”, en palabras de  Manuel Guede, quen engade que se procuraba “un espazo ficcional común, a pescuda dun imaxinario galego-portugués”. Outro dos condicionantes da obra foi o aspecto económico -unha constante na traxectoria teatral do noso autor- que determinaba un número preciso de seis personaxes.

Sitiografía

_________________________________________
Roberto Vidal Bolaño, Mar revolto. IGAEM, 2001. Estudo crítico de Inma López Silva.

3.2.13

Noticias de literatura-133. Xaneiro 2013

Manuel Rivas entrevistado por Carme Vidal:
Este libro [As voces baixas] non xorde dunha análise, dun proxecto racional, senón dunha estraña obriga e cando iso acontece, normalmente sae ben. Nace nun lugar que non sabes onde está, dentro túa pero tamén nun alma externada, como dicían nalgunhas culturas cando a xente para protexerse tiña dúas almas, unha interna e outra que pertencía á comunidade. Non me gusta o termo autobiografía. O que ten de biografía é de biografía dos outros ou, en todo caso, de biografía dun a través dos outros. O narrador é individual máis tamén plural, cheo de voces (Sermos Galiza).

Imaxe: Praza pública
Isaac Díaz Pardo homenaxeado no primeiro cabodano:
Poetas, músicos e "blasfemos  renderon un sentido tributo á herdanza cultural e intelectual do multifacético galeguista Isaac Díaz Pardo, falecido o 5 de xaneiro de hai un ano (Galicia Hoxe, 06-01-2013).
Lembranza de Francisco Fernández del Riego:
a editorial galega abrirá un blog na súa web (www.editorialgalaxia.com), no que se irá recollendo material sobre a obra e a figura do galeguista que o vindeiro luns cumpriría cen anos (La Voz de Galicia, 05-01-2013).
O neno e o can (Fina Casalderrey/Francisco Castro) na lista do Ibby:
O libro galego, publicado no 2012, e no que se contan historias de cativos que teñen que sobrevivir remexendo nos colectores de lixo, a epopea desas nenas obrigadas a casar con homes adultos ou a discriminación de quen é diferente por calquera motivo, logra desta maneira un gran recoñecemento internacional (La Voz de Galicia, 11-01-2013).
Fina Casalderrey 
Imaxe: Praza pública/ páxina web da autora
Fina Casalderrey entra na RAG:
Fina Casalderrey, natural de Pontevedra, é un dos grandes nomes da literatura galega con arredor de cincuenta títulos publicados. A súa primeira aportación á escrita dos máis novos foi Mutacións Xenéticas en 1991. En 1996 Os misterios dos fillos da Lúa outorgoulle o Premio Nacional de Literatura Infantil e Xuvenil. Na súa traxectoria atópanse tamén tres singulares libros de recompilación de gastronomía tradicional, escritos canda o seu compañeiro Mariano García, O libro da empanada, Festas gastronómicas de Galiza e Repostería en Galiza (Sermos Galiza, 19-01.2013).

Marilar Aleixandre presenta A vaca caníbal:
Brensa, a vaca protagonista, conta en primeira persoa como se desenvolve a vida na aldea, o seu proceso de aprendizaxe desde que é unha xovenca, a relación cos rapaces da familia, as trasnadas, os consellos de súa nai e tamén os castigos recibidos (El Correo Gallego, 22-01-2013).
Foto: Galicia Hoxe/ Uvigo
Agustín Fernández Paz, Honoris Causa:
Por todos os seus “méritos vitais, literarios, humanísticos e universais; por ser un narrador elegante e absolutamente comprometido coa defensa da lingua; por ser unha persoa coherente que buscou sempre transformar a sociedade desde a escola pública e se implicou na vangarda da renovación pedagóxica; por ser un dos narradores galegos máis universais, un dos mellores facedores de lectores, coñecido dentro e traducido fóra, por ser un exemplo de ética e dinamismo ao servizo da terra nosa e da terra enteira…” (Galicia Hoxe, 28-’1-2013).