Avespa velutina e variantes

Imaxe: Pepa Losada / La Voz de Galicia

Lemos en La Voz de Galicia (03-01-2017) un simpático e interesante artigo de María Santalla. Titúlao "¿Vespertinas, brillantinas, comunistas, estatinas, ghalopinas...? No, velutinas". Recolle nel as distintas denominacións que lles foron dando nos avisos ao 112 sobre avistamentos de nespra asiática. Polo de agora non son máis que grallas léxicas (tímpano duro, termo novo e arrevesado...), pero andando o tempo poida que algunha desas denominacións acabe por facer o mesmo ca o insecto: quedar tan campante no niño do dicionario co seu novo significado. Mesmo haberá quen as eleve á categoría de ovispas. Xa se irá vendo co tempo.
Algunhas das denominacións recollidas son moi plásticas e deixan ao descuberto ese mecanismo psicolóxico que pomos en funcionamento á hora de etiquetar algo que non nos merece á mellor das consideracións: "raza loba", "ghalopinas africanisadas". Un bo alcume resulta máis identificador ca un nome, mal que nos pese a humanos e bechos.
E disto nin se libran os tradutores automáticos, que tamén teñen o seu corazonciño. A versión en galego deste artigo converte un "niño de raza loba" nun "neno de raza loba"; coma quen di, un neno que vai para cacique ou amigo e asesor de caciques. (Xa sabemos que hoxe non existen, pero que Deus nos garde deles. Para as velutinas xa iremos buscando amaño).