Noticias de literatura-92

Antón Fortes presenta Á sombra dos anacardios:

Neste álbum preténdese advertir da alta porcentaxe da poboación infantil afectada pola sida en Guinea-Bissau. Este país africano é un dos que rexistra maior subdesenvolvemento de todo o mundo. A mortalidade infantil, causada por esta desatención en saúde, é moi elevada no país: de cada mil nados vivos, 105 bebés morren antes de cumprir un ano (Galicia Hoxe, 26-12-2010).

Noticia da presentación de Á sombra dos anacardios no Xornal de Galicia (26-12-2010):

o autor presenta "esperanza" nesta obra, contrarrestando figuras escuras con alusións á morte coa "actitude vital desta poboación", transmitindo "a capacidade de se felices" destes pequenos.

Paul Auster agasállanos o Nadal en galego con Sunset Park:

Sunset Park, editado en galego por Galaxia, toma como punto de partida a vida de Miles Heller, un mozo de vinte e oito anos, que aos vinte desanoou os lazos que o unían ao mundo que ata entón coñecera; abandonou a universidade, despediuse con nocturnidade e unha breve nota dos seus pais, deixou Nova York, e ninguén volveu saber nada del (Xornal de Galicia, 26-12-2010).

Miroslav Sasek lévanos de viaxe:

Este autor nado en Praga en 1916 fíxose coñecido polos seus libros de diferentes cidades de todo o mundo. Aínda que nun comezo, as obras ían dirixidas aos nenos, moi pronto se converteron en libros para todos os públicos pola súa orixinalidade en canto aos debuxos e aos textos. El Patito Editorial recupera estas brillantes creacións do debuxante checo, un referente dentro dos libros de viaxes destinados tanto aos pequenos como os grandes lectores (Galicia Hoxe, 27-12-2010).

Emma Pedreira fala no Xornal de Galicia (27-12-2010) sobre a súa poesía, en especial de Antítese da ruína:

É unha obra de reflexións sobre a morte, sobre as desaparicións que hai na vida dos individuos. Aí entran as perdas de familiares, de contornas físicas e dos seres máis vellos das nosas árbores xenealóxicas. É todo un proceso sucesivo que vive o ser humano até que acaba por se atopar só e só consigo mesmo.

Antón Riveiro Coello reedita Homónima (Galaxia):

Homónima volve sobre o escritor Suso Paradela, personaxe de A quinta de Saler e Os ollos de K, que decide marchar a México, á procura do seu avó, mestre anarquista que fuxiu da guerra civil á aldea de Tzataplán, e co que comparte nome e apelidos (Galicia Hoxe, 30-12-2010).

Fernández Naval conversa con Lupe Gómez sobre literatura e, en especial, sobre Bater de sombras (obra gañadora do Fiz Vergara Vilariño):

É na dialéctica luz-sombra que imos construíndo o ser que somos. Hai sombras diferentes, unhas están referidas a morte, perdas ou ausencias; outras teñen un carácter máis existencial, en relación coa íntima conciencia do que somos; hainas exteriores que nos axexan e condicionan e, aínda habería outras relacionadas con ese lado escuro que todos temos e que hai días nos que pretende instalarse en nós (Galicia Hoxe, 31-12-2010).